السلام عليكم  .. ♥

راح اتكلم اليوم إن شاء الله عن اختيار الجهاز المناسب لبرامج التصاميم .. وحيكون الموضوع مندرج تحت عدة نقاط هي :

أولًا : 

أفضل ( لاب توب ) لبرامج التصميم ..
الشي هذا جدًا عام الجهاز يعتمد على نوع استخدامه يعني كل شخص لازم يحدد الشي اللي يحتاجه والمميزات اللي يحتاجها بعدها يقرر .

ثانيًا :

- كرت الشاشة :

هو المسئول عن اي شيء نشاهده على شاشة الكمبيوتر من صور والوان ونوافذ وغيرها .. ومسؤول عن دقتها و وضوحها أيضًا 
وهي نوعين :
* مدمج 
* خارجي  

برامج التصميم تتطلب دقة عالية في الوضوح وكرت الشاشة الخارجي يضمن هذه الدقة .. كلما كان أعلى كان أفضل في دقة وضوح التصميم ..

لمعرفة المزيد عن كرت الشاشة والتفاصيل اتطلعوا على الرابط 👇
كل مايخص كرت الشاشة

- المعالج :

وهي نقدر نقول عنه مخ الجهاز وهو المسئول عن قراءة البيانات وتشغيل الجهاز ..
 فلازم نختار اصدار جديد + ضروري يكون 64 بت ..

  وعشان تستوعبوا اكثر وتفهموا ايش هوا المعالج اتطلعو على الرابط 👇
تعريب المعالجات وأنواعها

- الذاكرة :

تقوم بنفس عمل ذاكرتنا يعني تحفظ البيانات ومثل ما لدينا نوعان من الذاكرة مؤقتة ودائمة كذلك الحواسيب :
* مؤقتة
* دائمة

المؤقتة : 
هي الي تحتفظ بالبيانات بشكل مؤقت أو عشوائي وهي تحذف بياناتها بمجرد ماينقفل الجهاز اذا ماتم حفظها .. وهي تحسب بالقيقا
4G - 8G - 16G وهكذا يفضل تاخدوه 16 فما فوق ..

الدائمة :
هي تعد ذاكرة للقراءة فقط ..

لمعرفة المزيد عن الذاكرة والفروقات بينها اتطلعوا على الرابط 👇
انواع الذاكرة والفرق بينها

- القرص الصلب : 

وهو مايسمى بالهارديسك هذا سعته تكون عادة أعلى من الأولى والاثنين يتواجدوا داخل الجهاز بوقت واحد والهارديسك مرتبط بسرعة تشغيل الجهاز يعني :

الهارديسك نوعين :

SSD & HDD

الـ SSD : سرعته بتشغيل الجهاز أعلى وسعره أعلى لكن سعة تخزينه أقل بين ( 250قيقا الى 1تيرا فقط ) لكن الأفضل انكم تاخذوه عن الآخر ..
لأن الـ HDD : صحيح سعة تخزينه تصل لـ4 تيرا لكن ابطئ مرتين في تشغيل الجهاز بمعنى فالـ SSD السرعة تاخذ 30 ثانية بينما في الـHDD تاخذ دقيقة كاملة !

وتقدروا  تقراو أكثر عن الفرق بينهم في الرابط 👇
الفرق بين ssd & hdd

اختصار لما سبق : 

1- مهم كرت الشاشة يكون غير مدمج وعالي .
2- المعالج يكون احدث اصدار و 64 بت .
3- الذاكرة تكون 16 قيقا اقل شيء .
4- القرص الصلب يكون SSD وسعته بين 500 قيقا أو 1 تيرا مو اقل .

ثالثًا :

نوع النظام .. يعني الويندوز والماك وغيرهم ..
كثير جدًا يحتار بين الويندوز والماك خصوصًا كما هو معروف أن نظام الماك أفضل بكثير لكن الشائع هو الويندوز غير انه نظام الماك لايستقبل برامج التصميم مثل الويندوز .. مثل برامج الأوتوديسك وغيرها من برامج التصميم .. فـ الأفضل انه النظام يكون ويندوز..

نقطة ثانية !
كثير يشتري جهاز الماك ويحمل عليه نظام الويندوز فالجهاز يصبح بنظامين !! .. هذا يعتبر ثقل كبير على الجهاز وممكن يسبب ضرر عليه فالأفضل تفاديه وشراء الويندوز من البداية ..

رابعًا :

ماركة الجهاز .. الماركة مو شي مهم أهم شي تكون ماركة متعارف عليها ويتواجد بها جميع المواصفات السابقة .


آخر شي حابة أقلكم كم نصيحة عشان تتفادوا خراب الجهاز لا سمح الله  ♥

1- ضروري جدًا قبل كل شي يكون عندكم حامي للجهاز من الفايروسات من النوع الجيد والآن بنفس الويندوز وفروا حامي .
2- تنظيف دوري للجهاز سواء من الفيروسات او نقل للملفات ماينفع ابدًا كل الملفات تكون موجودة في الجهاز حيسبب ثقل ع الجهاز ضروري نقلها لقرص صلب خارجي .
3- كمان الآن أغلب الأجهزة اصبحت بشاشة لمس نصيحة عدم وجودها افضل لأن الشاشة راح تسير عاكسة جدًا بوجودها .
4- عمل نسخ احتياطية من شغلكم عشان تتفادوا ضياعها لو حصل شي مفاجئ .


إن شاء الله الموضوع يكون مفهوم للجميع وأي سؤال تقدروا تتواصلوا معايا على أي وسيلة حابينها .. في أمان الله ♥