SUNSHINE || سحر البدايات 💫
الأحد, سبتمبر 16, 2018" بسم الله الرحمن الرحيم "
الحياة مو وردية أبدًا ولا ممهدة قدامنا والأبواب معظمها مغلقة ولكن بنفس الوقت لكل باب مفتاح وكل غروب يتبعه شروق .. الحياة محتاجة الناس الشغوفة القوية المؤمنة .. حياتنا ملياااانة اشياء سيئة وكل ماكبرنا واتعمقنا في تفاصيل الدنيا وفهمنا الواقع كل ما كان سببنا لخلق الدوافع الإيجابية اكبر !
الصعوبات و المواقف الي تسير وتقفل الحياة قدامنا تحسسنا بإحباط كبير وممكن تقفل بوجهنا كل السبل ..
مو سهل تلاقي اللي تبغاه مو سهل تعيش مرتاح مو سهل تكون مبسوط طول اليوم ولا حتى سهل تنام بدون فقرة التفكير اللي توجع الراس .. مو سهل أبًدااا نلاقي أجوبة للأسئلة اللي تملأ راسنا واحنا على المخدة ..
الواضح زي ماقالوا الزمن الجميل خلص .. ماعاد سار الوضع سهل .. الزمن الحالي على قد ماسهلنا أشياء كثيرعلى قد ما صعب سبل العيش البسيطة ! حتى النوم سار أصعب ..
طيب والحل نعيش كلنا زي الآلات ؟ نشتغل .. ناكل ونشرب وننام عشان نعيش وبس !
ننسى الهدف الأساسي من وجودنا وهو إعمار الأرض ؟! كدا ببساطة نستسلم !
هذا كان حوار بيني وبين نفسي قبل فترة من الزمن ( قبل كم سنة ) وبعدين يا مودة فين كمية الشغف اللي داخلك للحياة .. حتروح !
- أكيد لأ ..
فعليًا احنا محتاجين نخلق ونكتشف النقاط اللي تساعدنا نجدد روحنا ونكمل بشغف كبير للحياة .. زي البدايات الجديدة في حياتنا اللي مليانة دائمًا بالحماس والإيجابية .. البدايات الجديدة تساعدنا نحس بالأمل ونعطي كل اللي عندنا .. مرحلة دراسية جديدة ، بيت جديد ، اصدقاء جدد أو حتى شروق شمس جديد .. عشان كدا سرت أحاول اعتبر كل تفصيلة ويوم بحياتي بداية جديدة كليًا
( فيما عدا الأشياء اللي مهم تكون مرتبطة بالسابق ) ..
أتوقع أكتر شي ساعدني في وصولي لدي المرحلة من الشغف والطاقة الإيجابية ( غير أسباب كتييير ححكيكم هيا بعدين ) .. هوسحر البدايات .. من بعدها سرت خبيرة في صنع البدايات الجديدة لدرجة سرت استمتع جدًا وأكون متشوقة يكون عندي شي أحتاج أخلق له بداية جديدة يوميًا ..
كوني إنسانة من الصعوبة إنها تركز في شغلتين في وقت واحد لأنه في الغالب ينتهي الموضوع بتوتر شديد ناحيتهم ..
(احتجت وقت طويل عشان أفهم هذه النقطة في شخصيتي على فكرة) لأنه بإعتباري أنثى وعادةً الإناث يقدروا يتفننوا في أنهم يكونوا بيشتغلوا على أكتر من شغلة بوقت واحدة بدون أي مشكلة !!
الموضوع كان يثير إهتمامي .. ليش ! .. أنا مو أنثى كاملة .. طيب هرموناتي فيها مشكلة !! طيب أحتاج علاج ..؟
- لاتلوموني كنت طفلة وبعدها مراهقة فكان الموضوع درامي بحت
مع الوقت قدرت أكتشف أنها ميزة فيا وليست نقص .. وإني أنثى كاملة متكامة وأنه عادي مو كل البنات فيهم نفس الصفات ..
واستغليت هذه النقطة لصالحي في إني اصُب كل اهتمامي في نقطة معينة إلى أن اطلع بمخرج يرضيني .. مو ضروري يكون كامل
أهم شي يكون يرضيني وأكون متأكدة إني كنت مبسوطة وأنا بشتغل على الموضوع دا ..
ومع ميزتي إني أركز في شغلة لين أتقنها ومع الحل الي لقيتوا لتجديد طاقة الشغف في روحي سرت مستعدة لأي باب ينقفل ولأي عائق يواجهني ..
أعطيكم مثال بسيط :
أيام الجامعة كنت أتحمس لأي مادة غلسة تواجهني وكأنه تحدي جديد في لعبة بلعبها .. كل يوم دراسي جديد لهذه المادة كنت أعتبره مرحلة من التحدي ذا ولازم اجتاحه بنجاح ومرة تصيب ومرة تخيب ومرة أخذت F ..
لكني كنت مؤمنة بقدراتي عشان كدا كان عندي يقين تام إنه حخرج من التحدي بنهاية ترضيني وأهم شي أكون سعيدة !
وحرفيًا كنت أعتبر كل يوم أول يوم في المادة بحماس جديد وشغف جديد وروح جديدة ..
مو مهم النتيجة تكون 100% أهم شي روحك تخرج جديدة وأقوى مع كل تحدي تمري فيه ..
وعشان روحك للأبد تفضل سعيدة لازم تلاقي سبب سعادتها وتوفريه .. سعادتي دايمًا في التفاصيل الصغيرة والبدايات الجديدة ..
عشان كدا أحب أصنع التفاصيل الصغيرة اللي تغذي شغفي وروحي ..
عشان كدا أحب أصنع التفاصيل الصغيرة اللي تغذي شغفي وروحي ..
مثال اجتماعي :
العلاقات بالنسبة ليا تحدي وغالبًا أصعب من أي شي تاني .. لأنه فيها طرف آخر..
يعني مد وجزر يعني شد وأرخي
يعني مد وجزر يعني شد وأرخي
محتاجين نضيف دوافع لنا في تكملة العلاقة .. جربت البدايات الجديدة في مرات كثيرة ونجحت نجاح باهر ..
لكن في الموضوع دا حيكون أصعب شوية لأنه غالبًا التحديات هنا توجع !
مع كل مشكلة أو سوء تفاهم يواجه العلاقة خذوا وقفة وفكروا بكل شي سار وأتحاوروا وبعدها أبدأو من جديد
أنسوا كل شي كان قبل السيء قبل الجميل اتبعوا ذا الأسلوب وقت ماتحسوا أنه العلاقة بدأت تسير بطريق مسدود ..
جددوا كل شي بينكم المواقف والصور وحتى تبادل الأغاني .. لأنه عادة لمن توصلوا لدي المرحلة تكونوا محتاجين تجديد
على فكرة أغلب المشاكل اللي تسير بين العلاقات تكون ردة فعل في لحظة إنفعال أو سوء فهم .. وبعد كل مرة وكل مشكلة أبدأو بداية جديدة كليًا .. يتطلب الموضوع ذا قوة كبيرة وتفاهم بين الطرفين بس من باب تجربة أقلكم أنه النتيجة مضمونة ..
مع كل مشكلة أو سوء تفاهم يواجه العلاقة خذوا وقفة وفكروا بكل شي سار وأتحاوروا وبعدها أبدأو من جديد
أنسوا كل شي كان قبل السيء قبل الجميل اتبعوا ذا الأسلوب وقت ماتحسوا أنه العلاقة بدأت تسير بطريق مسدود ..
جددوا كل شي بينكم المواقف والصور وحتى تبادل الأغاني .. لأنه عادة لمن توصلوا لدي المرحلة تكونوا محتاجين تجديد
على فكرة أغلب المشاكل اللي تسير بين العلاقات تكون ردة فعل في لحظة إنفعال أو سوء فهم .. وبعد كل مرة وكل مشكلة أبدأو بداية جديدة كليًا .. يتطلب الموضوع ذا قوة كبيرة وتفاهم بين الطرفين بس من باب تجربة أقلكم أنه النتيجة مضمونة ..
- بحاول ما استرسل هنا كتير لأنه نفسي أتكلم عن دا الجزء في تدوينة لحال لأنه لو استرسلت حخرج عن الهدف الأساسي
ممل ومتعب نفسيًا إنه الواحد يعيش عشان يخلص يومه وبس .. واتأكد لو وصلت لهذه المرحلة أنت محتاج مساعدة ..
اخلق البيئة والجو الخصب لتجديد روحك فتش عن شغف الحياة داخل أعماقك غالبًا حيكون موجود وأنت مانتبهت له
البدايات الجديدة سبب رئيسي من أسباب طاقتي المتجددة حبيت أشارككم هو .. فكروا بينكم وبين نفسكم عن سبب يجدد روحكم دائمًا ..
ولحد ماتلاقوا أسبابكم الخاصة جربوا البدايات الجديدة ..
وشاركوني تجاربكم عن موضوع تجديد الروح .. دمتم بشغف لاينطفىء .
2 التعليقات
تدوينة مليانه انتعاش و نور اصفر 🤩
ردحذفصدقتي البدايات لها طاقة ايجابية مختلفة .. وهي فرصة ذهبية للي يبغى يحسن نفسه 👌🏼
لو بداية كل يوم عمل طاعه مختلفة ، وكل بداية اسبوع اكتسب عادة كويسة ، وبداية كل شهر حدد كتاب يقرأه و بداية كل سنة رتب اهدافه وخطط لها ، هالانسان عمره ما تكون حياته ساده بالعكس منتعشه ومليانه مغامرات ..
البدايات نعمة من ربنا لازم نستشعرها بجد و نستثمرها ونشكر ربنا عليها
تدوينة شحنتني ايجابية شكراً مودة ♥️
للأبد احب طاقتك .. عفوا ✨
حذف