ايش يعني interiordesign# ! .. ليش ممكن اتخصصه ؟

الأربعاء, أغسطس 03, 2016

طاب يومكم ..

اليوم ان شاء الله الموضوع راح يكون عن التصميم الداخلي :

معناه !

كيف اعرف انه القسم المناسب ليا !

وظيفة المصمم الداخلي وطبيعة عمله !

مجالات العمل الممكنة !

نصايح مني ..

معناه !

هو فن التعامل و وضع الحلول والتخطيط والتصميم للفراغات الداخلية لإيجاد الجو المناسب .. والتي تهدف لتسخير الإحتياجات المادية والروحية والإجتماعية ووسلامة المبنى للناس بأقل جهد وادراك واسع مع ابتكار بمعطيات معمارية معينة .

مكون من جانبين :

*تقنية وتخطيط

*جماني وفني

كيف اعرف انه القسم المناسب ليا !

ركزوا بالأشياء اللي تجذبكم .. فيه كدا جانب لو كنتوا تميلوا له راح تكون اقسام التصاميم وبالأخص الصميم الداخلي مناسب لكم ..

ابرزها :

* اذا شدك حديث عن تصميم مكان ما او تأثيث صالون أحد المعارف مثلا ..

* اذا كنت تنجذب للصور والمرئيات أكثر من الكتابة

*اذا كنت تملك خيال واسع

* اذا كنت مهتم وتحب الأعمال اليدوية

*وكمان اذا كنت مهتم بإعادة تدوير القطع والاكسسوارات

*اذا كنت من النوع المستمع لرأي الطرف الثاني وحبك للمشاركة وتقبل الأراء

ليش ممكن اتخصصه !

التخصص هذا او مجال التصميم الداخلي جدًا واسع ومتفرع يساعدك على :

* التفكير الإبداعي والإبتكار

* تحليل الأمور بطريقة صحيحة والتركيز

* يغذي البصر لأنه يعتمد على تعويد العين على الجماليات والتفاصيل في كل شيء

* مجالاته متعددة لابد ان تلقى نفسك في جزء منها

* بالإضافة انه الآن مطلوب في سوق العمل

* ممتع ومواده عمليه ومنوعة

طبيعة المواد والدراسة !

تعتبر اغلب المواد بالقسم عملية وحتى المواد النظرية جزء منها عملي .. يعتبر متعب صحيح لكن جدًا الواحد يستمتع بالنسبة ليا اعتبره شغل خاص فيا اكثر من انه مواد عليها درجات ..

المواد تنقسم تقريبًا ثلاثة اقسام في كل ترم :

* الاستديو ..

وهي المادة الأساسية وتعتبر مشروع من بداية الترم لنهايته وله كم قسم بالنسبة لكليتنا يبدا بالتدريج (سكني _ تجاري _ اداري _ سياحي واخر ترمين بحث مشروع تخرج واخر ترم مشروع التخرج ) ... حتكلم في تدوينة بسيطة عن مادة الاستديو واشرحها ان شاء الله ..

* المواد العملية ..

تعتمد على المشاريع ومن هذي المواد مادة تصميم اثاث ومادة رسومات تفصيلية وغيرها ..

* المواد النظرية ..

مواد تتكلم عن الدراسات ف التصميم ولكن ساعات يكون فيها بعض المشاريع العملي وانا صراحة افضل دا الشي عشان المعلومات تثبت بالعملي اكثر

وظيفة المصمم الداخلي وطبيعة عمله !

حتكلم بإختصار على هيئة نقاط عن وظيفة المصمم الداخلي وعمله :

* ااستبيان العميل :

يكتب فيه ادق التفاصيل والاجوبة الي حصل عليها من العميل لتنفيذ المشروع ايًا كان وتكون كمرجع له وللعميل بنفس الوقت ...

*رسومات توضيحية :

يعمل للعميل رسومات توضيحية للمشروع بطرق بسيطة باستخدام الوان مختلفة لسهولة الشرح ..

*المدة الزمنية :

تقدير المدة الزمنية وتكون اقرب للدقيقة مع مراعاة الاستثناءات والمشاكل اللي ممكن يمر فيها المشروع ..

* التكلفة او الميزانية :

لازم المصمم يقدر الميزانية للعميل وبأقل تكلفة ويحسب جميع الماديات عشان يكونوا الاثنين على بينة من بداية المشروع حتى قبل الرسومات التوضيحية ..

*مرحلة العمل :

هذي راح تكون مرحلة التنفيذ وخلالها حيكون متواصل مع العميل بالطبع ومع استشاريين على حسب نوع المشروع ..

* الاستشاريين :

لابد ان يكون للمصمم الداخلي استشاريين من مجالات مختلفة لاختلاف مشاريع التصميم من سكنية وتجارية وحتى بالمجالات الصحية وغيرها ..

مجالات العمل المتاحة للمصمم !

احلى مافي التصميم الداخلي مجالاته المختلفة في العمل حذكرلكم بعضها :

* تصميم الفراغات ( السكنية _ تجارية _ الادارية _ السياحية وغيرها )

* تصميم الأثاث والاكسسوارات

* تصميم الديكورات في المجالات الاعلامية

* المجال الأكاديمي

* تصميم الديكورات في المناسبات

* التسويق في مجال التصميم

* تنسيق الحدائق والفراغات الخارجية مثل التراس وغيره ..

* التصوير الفتوغرافي من خلال تصوير المشاريع للشركة الي بتعمل فيها

في مجالات كتير تانية تندرج تحت التصميم الداخلي حتكتشفوها بنفسكم بعد ماتتخصصوا ان شاء الله

جا وقت نصايحي :) !

آخر شي ان شاء الله راح اكتب كم نصيحة راح تساعدكم ان شاء الله في هذا القسم برأيي الشخصي :

* غذوا عيونكم بصريًا بكل شي يختص بالجمال والتفاصيل

* انتقدوا اعمالكم بنفسكم ولاترضوا بالجميل مادام فيه الأجمل

* النفسية لها دور مهم في انجاز مشاريع واعمال جميلة ومتقنة اهتموا فيها

* عيشوا التصاميم ونموا خيالاتكم

* خلوكم واثقين من اعمالكم واعتبروها جزء منكم

* اتمسكوا برأيكم لو متأكدين منه وصلوا رأيكم بكل ثقة للطرف الثاني سواءً مديركم او استاذكم

* الرسم مو كل شي في التخصص هذا ممكن حيعطيكم ميزة عن غيركم لكن الاشياء الي تحتاجوها بالتخصص حتتعلموها فيه

* الصبر وطولة البال مهمة جدًا

* المرونة في الرأي وتقبل الانتقادات شيء مهم جدًا

* الالمام بالمواد بالسوق واسعارها

* حاولوا اعمالك تكون حسب ذوقكم شان تقدروا تبدعوا وتحبوها وتعملو لكم مسار تمشوا عليه مميز لكم

* لاتستحوا تقتبسوا افكار مش عيب ابدًا بالعكس دايمًا الاقتباس ينمي العمل

القاكم على خير ..

0 التعليقات