Coffee Bar | هدية لمحبين القهوة ❤
الأحد, أبريل 16, 2017
" السلام عليكم ورحمة الله وبركاته "
قبل فترة كان زواج أخويا 🎉 .. احترت كتير بالهدية الي راح اقدمله ياها 😕 .. لين أفتكرت اكتر شي يحبه و هو القهوة .. وقررت اعمله شي بنفسي بما اني مصممة داخلية تعالوا نشوف سوا ✌ ..
الي عملتله هو كان عبارة عن ركن للقهوة مع آلة قهوة وكم حاجة لطيفة حطيناها راح ابدأ بالترتيب .. ❤
- أول شي اشتريت الأساس الي هو رول طباشير يتلصق على الجدار
( اشتريته من موقع نرسم .. موقع سعودي فيه اشيء كثير فنية وقرطاسية )
- تاني اخدت رف ابيض عشان احط عليه الأغراض
( اشتريته من ايكيا .. سعره كان 65 ريال سعودي واتوقع فيه منه الوان )
- وطبعًا جبت الطباشير للكتابة
( تقدروا تستخدمو اي نوع طباشير وفي بعضها ثابتة بس تروح بالموية .. انا استخدمت الوان باستل كمان تنفع )
- آخر شي اشتريت آلة القهوة
( اشتريتها من حساب بالانستقرام .. تسوي انواع كثير من القهوة بارد وحار الكبسولات متواجدة بكل مكان )
- دحين خلونا نجي للتطبيق
( اول شي ثبت الرف .. فوقه حطيت الرول سهل جدًا ثبتيه بالارتفاع الي تشوفيه مناسب )
- كتبت على الرول بألوان الباستل قائمة بالقهوات او المشروبات ساخنة وباردة
( رسمت رسمة كوب قهوة كمان .. وحطيت علامة صح عند انواع القهوة المفضلة عند اخويا )
- نجي الآن للرف اضفت عليه شوية اكسسوار وكوب والقهوة
( هذه صورة الركن من بعيد حبيت النتيجة ❤ )
( وهذه صورة الركن من قريب بس للأسف ماعندي صورة مع الآلة )
وبكذا نكون خلصنا التدوينة الخفيفة اللطيفة ان شاء الله تكونوا حبيتوها .. اشوفكم قريب بإذن الله في حفظ الرحمن ❤
0 التعليقات