كلام حابة أهديكم هو بمناسبة الإختبارات | ♥ FOR U
السبت, أبريل 29, 2017
" مساء أو صباح الراحة على قلوبكم "
حتكلم اليوم كيف ممكن نحول شي ممل وروتيني لشي ممتع !!
طيب خلينا نتفق انه المناهج الدراسية اختلافها يعتبر ثقافة لنا .. كمان في سبب تاني ممكن
مننا ماينتبهله ألا وهو " اختيار الميول " 💙
في المدارس مثلَا عندنا مناهج ومعلومات ندرسها مختلفة عن بعضها
تمامًا وتلاقي نفسك تحب بعضها وتكره الباقي أو مو متقبله مو لسبب إنما مو جاي على
ميولك الشخصي خلال المراحل الدراسية ف المدرسة نمر بمناهج ومواد كثير نميل لبعضها
وننفر من بعضها ..
عشان كدا وجد التعليم العالي "الجامعة وما فوق " عشان بعد مانحدد ميولنا نتخصص بالشي الي نبغاه ♥ .. وبعض المدارس بدأت فعلًا بهذا النظام
طيب بسهولة جدًا تقدر تذاكر او تشتغل في مجال انت تحبه بعد المدرسة
.. لكن لو انت بمجال مو متقبله ومضطر تكمل فيه سواء مدرسة او حتى
جامعة
"مع اني احس انه ظلم للنفس ان الشخص يدخل تخصص
جامعي مو حابه " نرجع لموضوعنا انت الآن بالموقف عندك بكرا اختبار او تسليم لشيء معين لكنك مو
قادر تنجز لأي سبب كان "مو في المُود " أو "مو متقبل المعلومات دي "
في حركة كنت دايمًا اسويها ايام المدرسة لاني كنت مضطرة اذاكر عشان ادخل
تخصصي المفضل مع اني من الناس الي تكره نظام المدرسة "التلقين" احب اكون حره باختيار المعلومات دايمًا كنت اتضايق وقت الاختبارات احسها هم وظلم
ليا اني اذاكر شي واحفظه وانا مو حابته ؟؟
ايام الابتدائي ماما الله يسعدها كانت تضطر تجلس معايا وتلخصلي المعلومات عشان اتقبلها .. الحمدلله انا من النوع الي تثبت براسه المعلومة + افضل المواد العلمية اكثر لانها تتطلب تفكير مو زي النظرية حفظ بدون فهم !!
بالصدفة وانا اذاكر مادة من المواد جلست كدا فوق المكتب حقي مسكت قلم وفتحت الكتاب .. ولاشعوريًا سرت اشرح لنفسي المادة بصوت عالي << كنت فاهمتها بس عملت كدا عشان اقدر ادخل المعلومات براسي بطريقة احلى واريح ..
يهمني دايمًا اكون مستمتعة بالشي الي اسويه مو مغصوبة .. من وقتها سرت اذاكر بدي الطريقة "اختلق سيناريو" وارتجل فيه ..
يمشي الوقت بسرعه وماحس فيه + ما انسى المعلومة ابدًا باختصار تعليم بالترفيه مو كل شي نسويه بحياتنا بمزاجنا في اشياء
مانحبها لازم نسويها عشان نوصل للاشياء الي نحبها .. انا كنت متضطرة ادرس ١٢ سنة بطريقة "التلقين" بس عشان ادخل التخصص الي بحلم فيه من انا طفله .. وصراحةً اكتشفت بعد مادخلت التخصص انه يستاهل اني ادرس دي السنين
كلها عشان اوصله ..
فإذا احنا بالحالتين مضطرين نذاكر ونحفظ ليش مانسوي هذا الشي بنفسية
مفتوحة وبطريقة أفضل وامتع !!
راح أذكر كم شيء ممكن يفيدكم وقت المذاكرة : ♥
·
طبيعة الإنسان مايحب الإلزام بشيء مايحب أحد يأمره بشي ..
لازم تحطوا ببالكم ان الشي الي تذاكروه او المشروع الي بتعملوه انتم حابينه
ومقتنعين فيه .. " ما اختلف معاكم في اشياء ماتكون على
مزاجنا " .. لكن الآن اعتبروا انه شي راح يوصلكم للشي
الي تبغوه بالمستقبل ..
·
امسكوا الفهرس او مواضيع المنهج .. ابدأو من المواضيع الي ماقد مرت
عليكم او مو فاهمينها .. عشان لو ضاق الوقت تكونوا مذاكرين الأشياء المهمة ..
·
امسكوا كل مادة لحال وكل مادة
قسموها لأجزاء حسب مواضيعها من الأهم للمهم واعتبروه منفصل عن بعضه .. لاتفكري انه اووه فاضلي كثير لأنكم
اذا خلصتي كل جزء لحال حتحسوا انكم انجزتوا اسرع .. ودا الشعور بيعطيكم دافع ..
·
اكتبوا مواضيع المواد في ورقة وكل
ماتخلصوا من واحد حطوا علامة صح جنبه أو اشطبوه حتحسوا بإنجاز عظيم .. وبالأخير احساس الإنجاز والرضا عن
النفس مهمة كان صغير أهم بكتييير من الدرجة ..
آخر شي حابة اقلكم هو انه انتم بس !! الي تقدروا تتحكموا بمزاجكم وبالشي الي بتعملوه وتحولوه شي ممتع .. الله يجعل أيامكم كلها راحة ♥
0 التعليقات